ခေတ်ပြိုင် - ကလေးစစ်သားဟောင်းတွေဟာ ကလေးစစ်သား
ဘ၀ကနေ လွတ်မြောက်လာခဲ့ပြီးတဲ့နောက် ပြင်ပလောကမှာ ဘယ်လို အခက်အခဲတွေနဲ့ တွေ့ကြုံနေရပါသလဲ။

ဦးအောင်မျိုးမင်း- အဓိက ကျနော်တို့တွေ့ရတဲ့ကလေးတွေက အရွယ်နဲ့မလိုက်တဲ့ဘ၀ကို ဖြတ်သန်းခဲ့ရတယ်။ စစ်တပ်အတွင်းမှာထဲကိုက သူတို့မှာ အကြမ်းဖက်လိုတဲ့စိတ်၊ စိတ်ဓာတ်ကျတဲ့အခြေအနေ အဲလိုမျိုးအများကြီးဖြစ်လာတယ်။

တချို့ကလေးတွေဆိုရင် အရွယ်နဲ့ မလိုက်အောင် အရက်ကိုအလွန်အကျွံသောက်တာ၊ နောက် ပြဿနာတခုကိုကြုံတိုင်း အကြမ်းဖက်ဖြေရှင်းလိုတဲ့စိတ်က အများကြီးဖြစ်လာတာတွေ့ရတယ်။

ဒီလိုမျိုးဖြစ်လာတဲ့အခါကျတော့ ကလေးတယောက်ဟာ ကလေးအနေနဲ့ ပုံမှန်မဖြတ်သန်းခဲ့ရတဲ့အတွက် ဒီဒဏ်ရာတွေကို ပျောက်အောင်ဆောင်ရွက်ပေးဖို့ လိုအပ်နေတာတွေ့ရတယ်။ အခုလောလောဆယ် တချို့ကလေးတွေကို လုံခြုံတဲ့နေရာမှာ တခြားကလေးတွေနဲ့ အတူတူထားကြည့်တယ်။ အဲဒီကလေးတွေမှာ ဘာဖြစ်လာလဲဆိုတော့ ခုနတုန်းက အတိတ်ကအကြမ်းဖက်မှုတွေကြောင့်  သူတို့မှာ အခြားကလေးနဲ့လည်း
ရောရောဝင်ဝင်နေလို့မရဘူး။ သူတို့ကိုယ်သူတို့ သိမ်ငယ်နေတယ်။ တချို့ကျရင်တော့ အရမ်းကြီးကို အကြမ်းဖက်လိုတဲ့စိတ်နဲ့ပဲ ပြဿနာကိုဖြေရှင်းတာတွေ့ရတယ်။

ခေတ် - ဒီဘက် ထိုင်းနိုင်ငံဘက်ကို နအဖစစ်တပ်ထဲကနေ ထွက်ပြေးလာတဲ့ ကလေးစစ်သားတွေရဲ့ အခြေအနေကရော။

အောင် - တချို့ကျတော့ ဒီထိုင်းနိုင်ငံဘက်ကို ထွက်ပြေးလာတယ်။ ထွက်ပြေးလာပေမယ့် ထိုင်းအစိုးရကနေ အရင်တုန်းက နအဖနဲ့သဘောတူညီထားတဲ့ စစ်သုဥ့်ပန်းလွှဲပြောင်းရေးဆိုတဲ့ သဘောတူညီချက်ကြောင့် သူတို့ကို လုံလုံလောက်လောက် ကူညီပေးနိုင်တာမရှိဘူး။ ဘာဖြစ်လို့လဲဆိုတော့ ဒီကလေးတွေက စစ်တပ်ကထွက်ပြေးလာတယ်။ ဒါပေမယ့် ထိုင်းစစ်တပ်နဲ့ မြန်မာစစ်တပ်ကြားထဲမှာ သဘောတူညီချက်အရ ဒီကလေးတွေကိုတွေ့လို့ရှိရင် ထိုင်းစစ်တပ်ကဖမ်းပြီးတော့ မြန်မာပြည်ပြန်ပို့တာရှိတယ်။

အဲဒီတော့သူတို့တွေမှာ ဒီဘက်ရောက်လာလို့ရှိရင်လည်း လုံလုံခြုံခြုံမရှိဘူး။ ပထမဦးဆုံးတချက်ကတော့ သက်သေအထောက်အထားမရှိတဲ့ တရားမ၀င်မြန်မာနိုင်ငံသားအနေနဲ့ အဖမ်းခံထိနိုင်တာတခုရယ်၊ နောက်တခုကတော့ စစ်တပ်ကထွက်ပြေးလာတယ်ဆိုတာသိလို့ရှိရင် မြန်မာစစ်တပ်လက်ထဲကို ပြန်အပ်နိုင်တဲ့အခြေအနေကြောင့် သူတို့အခြေအနေက ပိုပြီးတော့ဆိုးတယ်။

ခေတ် - အဲဒီကလေးတွေ နောက်တော့ ဘယ်နေရာကိုရောက်ကုန်ကြလဲ။

အောင် - တချို့နေရာတွေမှာကတော့ ဒီကလေးတွေကို တတိယနိုင်ငံအထိ ပို့ပေးဖို့ဆိုတဲ့ အစီအစဉ်ထိတော့ လုပ်နေတာရှိတယ်။ ကလေးတချို့ဆိုရင် အဲဒီလိုသွားခဲ့တယ်။ ဒါပေမယ့် သွားတဲ့အခါမှာလည်း ဘယ်လိုမှ ရေရှည်အတွက် အကျိုးစီးပွားတော့ မဖြစ်နိုင်ဘူး။ ကလေးတွေမှာ ဘာသာစကားအခက်အခဲရှိတယ်။ နောက်တခါ လူနေမှုအဆင့်အတန်းမတူဘူး။ အခြားသူတို့နဲ့ နီးစပ်တဲ့လူတွေမရှိတဲ့အခါမှာ တတိယနိုင်ငံမှာ လုံခြုံရေးအရ လုံခြုံသွားပေမယ့် စိတ်ဓာတ်ပိုင်းဆိုင်ရာ ထိခိုက်မှုတွေအများကြီးရှိတာ ကျနော်တို့တွေ့ရတယ်။

ခေတ် - နယ်စပ်ကတိုင်းရင်းသားအဖွဲ့အစည်းတွေကရော သူတို့ကို စောင့်ရှောက်ထားကြတယ်မဟုတ်လား။

အောင် - အဲလိုမျိုးဟာလည်း ရှိခဲ့တယ်။ ဒါပေမယ့် အခုတိုင်းရင်းသားအဖွဲ့အစည်းတွေအောက်မှာတော့ မရှိတော့ဘူး။ တချို့က ဒီဒုက္ခ သည်စခန်းတွေမှာ ဒါမှမဟုတ် တခြားလုံခြုံတဲ့နေရာတွေမှာ သီးသန့်နေထိုင်ကြတယ်။

ခေတ် - ပြည်တွင်းထဲကိုပြန်သွားတဲ့ ကလေးတွေရောရှိလား။

အောင် - တချို့လည်းပြန်သွားတာတော့ရှိတယ်။ တချို့ကျတော့ ထိုင်းနိုင်ငံထဲမှာပဲ ကြုံရာဆုံရာနဲ့နေကြတယ်။ တော်တော်များများက မြန်မာပြည်ကို မပြန်ချင်ဘူး။ မပြန်ချင်ဘူးဆိုတဲ့ပြဿနာက ပြန်သွားလို့မိရင် အဖမ်းခံထိနိုင်တယ်။ နောက်တပ်ပြေးဖြစ်တဲ့အတွက် စစ်စည်းကမ်းနဲ့ အရေးယူခံရနိုင်တယ်။ ပြန်သွားလို့ရှိရင် သူတို့မှာ ပညာမတတ်ဘူး။ နောက်တခါ မိဘအဆင်မပြေတဲ့ ပတ်ဝန်းကျင်က ပေါက်ဖွားလာရင် ဘယ်လိုမှစားဝတ်နေရေး အဆင်မပြေနိုင်ဘူး။ အဲဒါကြောင့်မို့ ပြန်သွားတာနည်းတယ်။

ခေတ် - အရေအတွက်ကရော စာရင်းပြုစုထားတာရှိလား။ ဥပမာ ဒီနှစ်ပိုင်း ဒါမှမဟုတ် (၅) နှစ် (၁၀) နှစ်အတွင်းမှာ နယ်စပ်ဒေသကို ထွက်ပြေးလာတဲ့ကလေးစစ်သားအရေအတွက် ဘယ်နှစ်ယောက်လောက်ရှိပြီလဲ။

အောင် - ကျနော်တို့နယ်စပ်တလျှောက်မှာကြည့်မယ်ဆိုရင်တော့ ဒီ (၂) နှစ်အတွင်းမှာ အားလုံးပေါင်း (၁၀၀) ကျော်ရှိတယ်။ အဲဒီထဲက (၅၀) ကျော်လောက်ပဲ ကျနော်တို့စာရင်း အဓိကထားလုပ်နိုင်တယ်။ ကျန်တဲ့လူတွေက စာရင်းရှိပေမယ့် ဘယ်နေရာရောက်လို့ ရောက်သွားမှန်းမသိတဲ့ကလေးတွေရှိတယ်။

ခေတ် - သူတို့အတွက်ဦးတည်ပြီး သီးသန့်ကာကွယ်စောင့်ရှောက်မှုလုပ်နေတဲ့ အဖွဲ့အစည်း ဒါမှမဟုတ် အစီအစဉ်တွေရော ရှိပါသလား။

အောင် - အဲဒါမျိုးတွေရှိဖို့အတွက် ကျနော်တို့အများကြီးကြိုးစားတယ်။ တချို့အဖွဲ့အစည်းတွေကတော့ တယောက်နှစ်ယောက် တပိုင် တနိုင် ကူနေတဲ့ဟာမျိုးရှိတယ်။ ဒါပေမယ့် ဘာပြဿနာဖြစ်လဲဆိုတော့ စနစ်တကျလေ့ကျင့်ထားတဲ့လူတွေ၊ ကလေးတွေကို ဘယ်လို ပြုစုပျိုးထောင်မလဲ၊ ဘယ်လိုစကားပြောမလဲစတဲ့ လေ့ကျင့်မှုမျိုးမရှိတော့ တချို့အစီအစဉ်တွေက တယောက်နှစ်ယောက်ထဲပေမယ့် ကြာရှည်မခံဘူးဖြစ်သွားတယ်။

ခေတ် - မကြာသေးခင်က HREIB နဲ့ ရိုးမ (၃) သတင်းဌာနနဲ့ပေါင်းပြီး ကလေးစစ်သားနဲ့ပတ်သက်တဲ့ အစီရင်ခံစာတခုကို ထုတ်သေး တယ်နော်။ အဲဒီအစီရင်ခံစာကရော ဘာကိုအဓိကရည်ရွယ်ပြီး ထုတ်တာပါလဲ။

အောင် - ပထမအချက်ကတော့ နအဖက အခုအချိန်အထိ ဒီကလေးစစ်သား အသုံးပြုနေတဲ့ဟာကို သက်သေအထောက်အထားပြတဲ့ သဘောဖြစ်တယ်။ နောက်တချက်ကတော့ နအဖရဲ့ ကလေးစစ်သားများအား စစ်မှုထမ်းခြင်းမှ ကာကွယ်တားဆီးထိန်းသိမ်းရေးကော် မတီက တာဝန်ရှိတဲ့အတိုင်း စစ်တပ်ထဲရောက်ပြီးသားကလေးတွေကို ပြန်လည်ပြုစုပျိုးထောင်ဖို့အစီအစဉ်တွေ မလုပ်သေးဘူးဆိုတာ ထောက်ပြထားတာပါ။

ထူးခြားချက်ကတော့ အရင်တုန်းက နအဖက သူတို့ဆီမှာ ကလေးစစ်သားလုံးဝမရှိပါဘူးလို့ပြောတယ်။ ဒီဟာက အခြေအမြစ်မရှိတဲ့ စကားတွေဆိုပြီး သူတို့ပြောတယ်။ အဲ မကြာသေးခင်ကပဲ ကလေးစစ်သား အနည်းအကျဉ်းရှိပါတယ်ဆိုတာကို သူတို့က ထုတ်ဖော် လာတယ်။ ဒါပေမယ့် သူတို့ကော်မတီက တာဝန်ရှိတဲ့အတိုင်း ရှိတဲ့ကလေးတွေကို စစ်တပ်က အမြန်ဆုံးဖယ်ထုတ်ဖို့အတွက် အခုထိပျက်ကွက်နေတာကို ကျနော်တို့သုတေသနစာတမ်းမှာ ထောက်ပြထားတာပါ။

ခေတ် - မြန်မာနိုင်ငံမှာ ကလေးစစ်သားတွေသုံးနေရတဲ့ အဓိကအကြောင်းရင်းက ဘာလို့ပြောလို့ရပါသလဲ။

အောင် - အဓိကအကြောင်းရင်း ပထမပြောမယ်ဆိုရင်တော့ စစ်တပ်က အင်အားတိုးချဲ့ဖို့ လူလိုတယ်။ လူလိုတဲ့အခါမှာ အရွယ်ရောက် တဲ့လူတွေခေါ်ပေမယ့် မရတဲ့အခါမှာ ကလေးတွေဘက်ကို လှည့်လာတယ်။ နောက်တချက်ကလည်း ပြည်တွင်းစစ်တွေဖြစ်နေတယ်။ ဖြစ်နေတဲ့အခါမှာ ပြည်တွင်းစစ်ကြောင့် စစ်သားလိုတယ်။ ဒါလည်း အကြောင်းတရားတရပ်ပဲ။ နောက်တခုက ကလေးဆိုတာက မသိ နားမလည်တဲ့အရွယ်မျိုးဖြစ်တယ်။ ခြိမ်းခြောက်ရင်ကြောက်မယ်။ စဉ်းစားဆင်ခြင်မှုမရှိဘူး။ အဲဒီကလေးတွေက တိုင်းပြည်ရဲ့စီးပွားရေး အခြေအနေကြောင့် ကျောင်းခန်းထဲမှာမရှိဘဲနဲ့ လမ်းပေါ်ရောက်ကုန်တယ်။ စောင့်ရှောက်ရမယ့် မိဘတွေကလည်း စောင့်ရှောက်ရမယ့် အစား ကလေးတွေကိုပစ်ပြီးတော့ အလုပ်လုပ်နေရတယ်။ အဲဒီလိုအခြေအနေမျိုးမှာ ကလေးစစ်သားသုံးတာ ပိုပြီးတော့ဖြစ်လာတယ်။
ပြောပြရမယ်ဆိုရင်တော့ အစိုးရပျက်ကွက်မှုရယ်၊ ပြည်တွင်းစစ်ရယ်၊ တိုင်းပြည်စီးပွားရေး၊ လူနေမှု၊ ပညာရေးအခြေအနေ အားလုံးဆိုး ၀ါးနေတဲ့အတွက်ကြောင့်ပဲလို့ ပြောရမယ်။

ခေတ်-ငယ်ငယ်တုန်းကတော့ ကလေးစစ်သားပေါ့။ တပ်ထဲရောက်နေပြီးတော့ အသက်ပြည့်သွားတဲ့အချိန်ထိ ကလေးစစ်သားလို့ သတ်မှတ်တုန်းပဲလား။

အောင်-ဘယ်လိုပဲကြီးသွားကြီးသွား ဘယ်အရွယ်ပဲရောက်သွားရောက်သွား စစ်တပ်ထဲကို စ၀င်တဲ့အချိန်မှာ ဆယ့်ရှစ်နှစ်မပြည့်သေးရင် ဒီကလေးဟာ ကလေးစစ်သားလို့ပဲ ပြောလို့ရတယ်။

ခေတ်-ကလေးစစ်သားတွေရဲ့ မိဘတွေဘက်ကရော သူတို့သားငယ်တွေ စစ်တပ်ထဲရောက်ရ၊ ရှေ့တန်းစစ်မျက်နှာတွေကိုရောက်ရ၊ နောက်တော့ တပ်ထဲထွက်ပြေးသူပြေးကြရပြီး ဘယ်ဆီရောက်နေမှန်းမသိတော့တဲ့အခြေအနေကို ဘယ်လိုတုံ့ပြန်ကြပါသလဲ။

အောင်-မိဘဆိုတာတော့ သားသမီးအတွက် အမြဲတမ်းစိတ်ပူတာပဲ။ ဒါပေမယ့် စစ်တပ်ထဲရောက်တဲ့ကလေးတွေရဲ့ မိဘကတော့ ပိုပြီး စိတ်ပူတာပေါ့။ ဘာဖြစ်လို့လဲဆိုတော့ အရွယ်မရောက်သေးတဲ့အချိန်မှာ ကလေးတွေဘယ်လိုမျိုး အန္တရာယ်ကျရောက်နိုင်တယ်၊ ဘာမှသေသေချာချာသင်တာမရှိပဲ ရှေ့တန်းစခန်းတွေပို့တယ်၊ အန္တရာယ်ရှိတဲ့အလုပ်တွေ လုပ်တယ်ဆိုတာသိတဲ့အခါမှာာ မိဘတွေက ပိုပြီးတော့စိုးရိမ်တယ်။

စိုးရိမ်တဲ့အတွက် သူတို့အနေနဲ့ နအဖရဲ့ကော်မတီကိုသွားတိုင်တာ၊ အိုင်အယ်လ်အိုကိုသွားတိုင်တာတွေလုပ်တယ်။ လုပ်ပေမယ့် ဘာမှ ထူးခြားမှုရှိမလာတဲ့အခါ ပိုပြီးတော့ သူတို့မှာ ယူကြုံးမရဖြစ်တယ်။ နောက်ကယ်ထုတ်ချင်တယ်။ ကယ်လို့မရဘူး။ ဒုက္ခရောက်မယ် ဆိုတာ သိတယ်။ ဒါပေမယ့် ဘယ်လိုမှ ကယ်ထုတ်လို့မရဘူး။ အဲဒီလိုအခြေအနေမျိုးမှာ မိဘတွေရဲ့အသံကတော့ တော်တော်ကြီးကို သနားဖို့ ကောင်းတဲ့ အခြေအနေမျိုးမှာရှိတယ်။

ခေတ်-အခုလိုမျိုးအချိန်ပေးပြီး စိတ်ရှည်လက်ရှည်နဲ့ ဖြေကြားပေးတဲ့အတွက် ဦးအောင်မျိုးမင်းကို ခေတ်ပြိုင်က ကျေးဇူးအများကြီးတင် ပါတယ်။     ။