ရန်ကုန်ရှိ ထီဆိုင်ကြီးများ အချင်းချင်း (ငွေကျပ် ၂၀၀ တန်ထီ) သိန်း (၁,၀၀၀) ဆုကြေးထီများ စတင်ရောင်းချသည့် ယခုလအတွင်း ထီထိုးသူများအား အပိုဆု အပြိုင်ဈေးခေါ်နေသည့်အတွက် ထီဈေးကွက် အပြိုင်အဆိုင် ဖြစ်ပေါ်နေသည်။
“အစိုးရက သိန်း (၁၀၀) ကို သိန်း (၅၀) အပိုစနစ်နဲ့ သိန်း (၁,၀၀၀) ကို သိန်း (၅၀၀) အပိုဆုပေးရမယ်လို့ ပြောတဲ့အတွက် သိန်း (၁,၀၀၀) ကို သိန်း (၅၀၀) အပိုဆုပေးမယ်လို့ မိုးယံရွှေလမင်းနဲ့ မြတ်ဆုကုဋေက ပြောတယ်ဗျ” ဟု ရန်ကုန်မြို့ရှိ လစဉ်ထီထိုးသူ အငြိမ်းစား ရဲဝန်ထမ်းဟောင်းတဦးက ပြောသည်။
သို့သော် မြတံခွန်နှင့် အောင်သန်းဆုထီဆိုင်တွင် သိန်း (၁,၀၀၀) ပေါက်ပါက သိန်း (၆၀၀) အပိုပေးမည်ဟု ဆိုသဖြင့် ယင်းဆိုင်၌ ထီထိုးခဲ့ကြောင်း သင်္ကန်းကျွန်းနေ မောင်လှထွန်းဆိုသူက ပြောသည်။
မြတံခွန်နှင့် အောင်သန်းဆု ထီဆိုင်ကို ဆက်သွယ်မေးမြန်းချက်အရ သိန်း (၆၀၀) ပေးမည်ဆိုသည်မှာ အစိုးရက သတ်မှတ်ချက် သိန်း (၅၀၀) အပြင် အပို သိန်း (၁၀၀) ကို ထီဆိုင်ပိုင်ရှင်က သိန်း (၁,၀၀၀) ပေါက်သူအတွက် ထပ်မံဂုဏ်ပြုနိုင်ရန် စီစဉ်ခြင်းဖြစ်ကြောင်း ပြောသည်။
မြတံခွန်နှင့် အောင်သန်းဆုမှ သိန်း (၆၀၀) အပိုပေးခြင်းကို မိုးယံရွှေလမင်းနှင့် မြတ်ဆုကုဋေက မခံမရပ်နိုင်ဖြစ်ကာ သိန်း (၁,၀၀၀) ပေါက်ပါက သိန်း (၈၀၀) အပိုပေးမည်ဟုလည်း ရန်ကုန်တွင် သတင်းထွက်နေသည်။
အောင်ဆုထူးပိုင် ထီဆိုင်တဆိုင်က “သေချာပေါက် ပြိုင်ဆိုင်မှုတွေ ဖြစ်လာမှာပဲ။ ရောင်းအားကောင်းဖို့အတွက် ဆွဲဆောင်မှုတွေ လုပ်လာကြမှာပဲ။ တဆိုင်နဲ့တဆိုင် သူ့ထက်ငါ လုပ်နေကြမှာပဲ။ ကျနော်တို့ဆိုင်ကလည်း သူတို့ ဒီလိုပြိုင်ဆိုင်နေရင် သူတို့လို လိုက်လုပ်ရမှာပဲ။ ဒါတွေ မဖြစ်လာဖို့အတွက် သက်ဆိုင်ရာက သေသေချာချာ သတ်မှတ်ပေးသင့်တယ်” ဟု ပြောသည်။
အစိုးရက အပိုဆုကြေးကို သိန်း (၅၀၀) ထက် ပိုမပေးရန် ပြောဆိုမှုအရ အောင်ဘာလေသိန်းဆုဌာနမှ အကြီးအကဲများက ထီဆိုင်ပိုင်ရှင်များကိုခေါ်ယူကာ ပြောပြထားကြောင်း သိရသည်။
“သူတို့က သိန်း (၅၀၀) ထက် ပိုမပေးရဘူးလို့ ပြောတာပဲ။ ဒါပေမယ့် ကျနော်တို့က ထီထိုးတဲ့သူတွေကို လက်ဆောင်အပိုငွေသားပေးတာကျတော့ ကျနော်တို့ဆန္ဒပါ။ စေတနာပါ” ဟု မြတံခွန်နှင့် အောင်သန်းဆုထီကိုယ်စားလှယ်တဦးက ပြောသည်။
မြန်မာနိုင်ငံတွင် မိုးယံရွှေလမင်းနှင့်မြတ်ဆုကုဋေ၊ အောင်ဆုထူးပိုင်၊ မြတံခွန်နှင့် အောင်သန်းဆု စသော ထီဆိုင်များမှာ ထိပ်တန်း ထီဆိုင်ကြီးများဖြစ်ကြပြီး ထိပ်တန်းထီဆိုင်များ၏ ဈေးကွက်ပြိုင်ဆိုင်မှုများကြောင့် အခြားထီဆိုင်များကို ရောင်းအား ထိခိုက်နိုင်ကြောင်း ရွှေမောင်းထီဆိုင်၏ တာဝန်ရှိသူက ပြောသည်။
၎င်းက “ငွေအင်အားရှိလို့ အပြိုင်အဆိုင်လုပ်နေတာက ပြဿနာမရှိဘူး။ ထိုးတဲ့သူရတာပဲ။ ဒါပေမယ့် အခြားထီဆိုင်တွေက ပြဿနာရှိတယ်။ အစိုးရက တင်းတင်းကျပ်ကျပ်နဲ့ အပိုဆု (၅၀၀) အပြင် နောက်ထပ် ဘယ်လိုလက်ဆောင်မှ အပိုမပေးရဘူးဆိုတာမျိုး လုပ်သင့်တယ်” ဟု ပြောသည်။
ဒီဇင်ဘာ (၂) ရက်နေ့မှစ၍ အစိုးရထံမှ ထီတစောင်လျှင် (၁၈၂) ကျပ်နှုန်းဖြင့် ရောင်းချပေးပြီး ထီဆိုင်ကြီးများက (၂၅၀) ကျပ်ဖြင့် ရောင်းကာ ကိုယ်စားလှယ်များကို (၂၃၀) ကျပ်နှုန်းဖြင့် ရောင်းချခဲ့ပြီး နယ်မြို့များတွင် (၃၀၀) ကျပ်အထိ ဈေးပေါက်နေသည်။
“ဈေးကွက်ပြိုင်ဆိုင်မှုလုပ်ရတာက အရင်က သိန်း (၅၀၀) ပေါက်ရင် သိန်း (၅၀၀) အပိုဆုပေးခဲ့တုန်းက ထိုးသူတွေ များတယ်။ အခုက သိပ်မထိုးကြတော့ဘူး။ ဒီအတွက် မဖြစ်မနေ ထီးထိုးသူတွေကို မက်လုံးပေးဖို့ လိုလာတယ်” ဟု အတွေ့အကြုံ အနှစ် (၂၀) ခန့် ထီအရောင်းအ၀ယ်လုပ်လာသူတဦးက ဆိုသည်။
|
