ရန်ကုန် စည်ပင်နယ်နိမိတ်အတွင်းရှိ ကျူးကျော်နေအိမ်များကို ယခုလအတွင်း ရှင်းလင်းသွားမည်ဖြစ်ကြောင်း သိရသည်။
ပြီးခဲ့သည့် ဇန်န၀ါရီလမှစ၍ ကျူးကျော်နေအိမ်များကို ရှင်းလင်းမှု စတင်ခဲ့သည်ဟု ရန်ကုန်စည်ပင် အဆင့်မြင့်အရာရှိတဦးက ပြောသည်။
“မရမ်းကုန်းမြို့နယ်အတွင်းမှာ ရှိတဲ့ စွယ်တော်စေတီအနားမှာ ကျူးကျော်အိမ်တွေ (၆၀) လောက်ရှိတယ်။ အဲဒါတွေကို ရွှေပြည်သာက ၀ါးတရာကို ပို့လိုက်တယ်” ဟု ၎င်းက ပြောသည်။
ထို့အပြင် စည်ပင်ဧရိယာအတွင်းရှိ မြို့နယ် (၃၃) မြို့နယ်တွင် ကျူးကျော်အိမ်ရာများ ရှိနေသေးကြောင်း၊ ၎င်းတို့ကို ယခုလအတွင်း ထပ်မံရှင်းလင်းပေးသွားမည်ဖြစ်ကြောင်း သိရသည်။
“မရမ်းကုန်းက ကျိုက်ဝိုင်းအနားမှာလည်း ကျူးကျော်တွေရှိတယ်။ တောင်ဥက္ကလာ၊ မြောက်ဥက္ကလာ၊ ပုစွန်တောင်၊ ဗိုလ်တထောင်၊ ဒေါပုံ စတဲ့မြို့နယ်တွေမှာလည်း တနေရာစီမှာ အနည်းဆုံး အိမ် (၂၀) လောက် ရှိကြတာချည်းပဲ။ ဒါတွေကို ရှင်းလင်းတယ်ဆိုတာ မြို့ရဲ့ အင်္ဂါရပ်နဲ့ ညီညွတ်အောင် မီးဘေးအန္တရာယ် ကင်းအောင်လို့ပါ” ဟု စည်ပင်အရာထမ်းတဦးက ပြောသည်။
ကျူးကျော်နေထိုင်သူအများစုသည် အစိုးရပိုင်မြေနေရာ ကွက်လပ်များတွင် နေထိုင်ကြပြီး ၎င်းတို့အား ယခုကဲ့သို့ ရှင်းလင်းနေခြင်းမှာ အစိုးရပိုင်မြေများကို စာရင်းပြုစုနေသည့်အတွက် ဖြစ်ကြောင်း၊ ထိုနေရာများတွင် တည်ဆောက်ရေးလုပ်ငန်း သို့မဟုတ် အခြားတစုံတရာဆောင်ရွက်နိုင်ရန် စီစဉ်နေ၍ဖြစ်ကြောင်း မြို့ရွာနှင့် အိုးအိမ်ဖွံ့ဖြိုးရေးမှ တာဝန်ရှိသူတဦးက ပြောသည်။
ဝါးတရာသို့ ပြောင်းရွှေ့ခံရသော မရမ်းကုန်းမြို့နယ်မှ ကျူးကျော်အိမ်များကို ပေ (၆၀x၂၀) မြေကွက်များ စည်ပင်က အခမဲ့ ပေးသော်လည်း ၎င်းတို့အနေဖြင့် နေအိမ်ပြန်လည်တည်ဆောက်ရန် အခက်အခဲဖြစ်နေကြောင်း ခေတ်ပြိုင်က စုံစမ်းသိရသည်။
ယခုလအတွင်း ပြောင်းရွှေ့မည့် ကျူးကျော်နေအိမ်များစာရင်းကို တိတိကျကျမသိရှိရသေးဘဲ စာရင်းပြုလုပ်ဆဲဖြစ်ကြောင်း စည်ပင်အရာထမ်းက ပြောသည်။ |
