ပြီးခဲ့သည့် စနေနေ့က မြန်မာနိုင်ငံ၌ တိုက်ခတ်သည့် နာဂစ် ဆိုင်ကလုံးမုန်တိုင်းကြောင့် လူ (၃၅၀) ကျော်သေဆုံးပြီး နေအိမ် အဆောက်အအုံများ ပျက်စီးဆုံးရှုံးသွားကာ လူပေါင်း သောင်းနှင့်ချီ၍ အိုးမဲအိမ်မဲ့ဖြစ်သွားသည်ဟု စစ်အစိုးရပိုင် မီဒီယာများ၌ သတင်းထုတ်ပြန်သည်။
မုန်တိုင်းသည် ဧရာဝတီတိုင်း အနောက်ဘက် ကမ်းရိုးတန်းဒေသနှင့် ရန်ကုန်တိုင်း၊ ပဲခူးတိုင်း တို့တွင် တနာရီ (၁၂၀) မိုင်နှုန်းဖြင့် ၀င်ရောက်တိုက်ခတ်ခြင်းဖြစ်ပြီး ဟိုင်းကြီးကျွန်း၌ (၁၆၂) ဦး အပါအ၀င် ဧရာဝတီတိုင်းတတိုင်းလုံး၌ (၂၂၂) ဦး၊ ရန်ကုန်တိုင်း၌ လူ (၁၉) ဦး အပါအ၀င် တနိုင်ငံလုံး၌ အနည်းဆုံးလူ (၃၅၁) ဦး သေဆုံးခဲ့သည်ဟု မြန်မာ့ရုပ်မြင်သံကြား သတင်းအရ သိရသည်။
မုန်တိုင်းကြောင့် ရန်ကုန်မြို့၌ သစ်ပင်ကြီးများ၊ ကြော်ငြာဆိုင်းဘုတ်များ ပြိုကျပျက်စီးကုန်ပြီး နေအိမ်များနှင့် အဆောက်အအုံအမိုးများ လွင့်ထွက်ကုန်ကြောင်း၊ လျှပ်စစ်မီး၊ တယ်လီဖုန်းလိုင်း
နှင့် အင်တာနက်လိုင်းများ ပြတ်တောက်ကုန်ကြောင်း ရန်ကုန်မြို့ခံတို့က ပြောသည်။
ရန်ကုန်မြို့ခံတဦးက “စဖြစ်တာကတော့ (၃) ရက်နေ့က၊ မနက် (၃) နာရီကနေ (၇) နာရီခွဲအကြား အချိန်မှာ တော်တော်ဆိုးတယ်။ ရန်ကုန်မြို့ထဲက ကောင်းကင်မှာဆို သွပ်ပြားတွေ ကောင်းကင် ထဲမှာ ပျံနေတာတွေ့ရတယ်။ စလောင်းတွေ တော်တော်များများ ပျက်ကုန်တယ်။ ဆိုင်းဘုတ်ကြီး တွေ အကုန်လဲတယ်။ ဓာတ်တိုင်တွေ၊ ဖုန်းတိုင်တွေ အကုန်ပျက်တယ်။ အခု ရန်ကုန်မှာ မီးပျက် နေတယ်၊ ရေပျက်နေတယ်။ ဒီရက်ပိုင်းအတွင်းကို မီးရေ လုံးဝရနိုင်မယ့် အနေအထားမရှိဘူး” ဟု ပြောသည်။
ရန်ကုန်လေဆိပ်ကို ပိတ်ပစ်ခဲ့ရပြီး ရထားခရီးစဉ်များနှင့် မြို့တွင်း ပြေးဆွဲနေသည့် ဘတ်စ်ကား လိုင်းများလည်း ရပ်နားထားရကြောင်း ရန်ကုန်ဆိပ်ကမ်း ဘောတံတားအချို့ ပြုတ်ထွက် မြောပါ ကုန်ကြောင်း သိရသည်။
ရန်ကုန်တိုင်းအတွင်း၌ စမ်းချောင်း၊ ကြည့်မြင်တိုင်၊ အလုံ၊ တောင်ဥက္ကလာ၊ တောင်ဒဂုံ၊ သာကေတ၊ ဒေါပုံမြို့နယ်တို့တွင် ဆိုးဆိုးဝါးဝါး ထိခိုက်မှုရှိပြီး ပြည်လမ်းတလျှောက် မင်္ဂလာဒုံ၊ ထောက်ကြံ့၊ မှော် ဘီရှိ သစ်ပင်များ၊ ရန်ကုန်တက္ကသိုလ်၊ ကန်တော်ကြီး၊ ပြည်သူ့ရင်ပြင်နှင့် လွှတ်တော်အတွင်းပိုင်းရှိ သစ်ပင်များ ပြိုလဲကုန်သည်ဟု မျက်မြင်တို့က ပြောသည်။
မုန်တိုင်းဒဏ်ခံရပြီးနောက် ရန်ကုန်လူထု ရေးမီး အခက်အခဲနှင့် ရင်ဆိုင်ကြုံတွေ့နေရသည်ဟု မြို့ခံတဦးက ပြောသည်။
၎င်းက “ ရေသန့်ဘူးဆို ပြတ်ထွက်သွားတယ်။ မြို့ထဲက ရေသန့်ဘူး ချပေးတဲ့ ဆိုင်တွေဆို နာမည် စာရင်း သွားပေးထားရတယ်။ ဒီအတိုင်း ကောက်ဝယ်လို့ မရဘူး။ မီးသွေးဆိုင်တွေလည်း ဈေး တက်ကုန်တယ်။ ဈေးတွေကတော့ အားလုံး (၂၀၀၊ ၃၀၀၊ ၅၀၀) စသဖြင့် တက်ကုန်တယ်။ မြို့တွင်း ကတော့ ရေပြဿနာ တော်တော်တက်တယ်။ ကားတွေနဲ့ သွားသယ်ပြီး အိမ်ပေါ် တင်ရတယ်။ အဓိကကတော့ မီးမလာတဲ့အတွက် ရေတွန်းစက်တွေက မတွန်းနိုင်တဲ့အတွက် ရေမရတာ။ ကိုယ်ပိုင်အ၀ီစိတွင်းရှိတဲ့အိမ်တွေက ဆီကိုမျှထည့်ပြီး ရေကို မျှသုံးနေကြရတယ်။ ရန်ကင်းနဲ့ ကမ္ဘာအေးလမ်းဘက်က လူတွေဆိုရင် အင်းယားကန်က ရေကို သုံးရေအဖြစ် သွားယူနေကြရ တယ်။ အ၀ီစိတွင်းရှိတဲ့ ဘုန်းကြီးကျောင်းတွေကတော့ သောက်သုံးရေ အိမ်တွေကို နှစ်ပုံးသုံးပုံး ခွဲတမ်းနဲ့ ပေးနေတယ်။ အဓိက အဆိုးဆုံးကတော့ ရန်ကုန်မြို့ထဲက စမ်းချောင်းပဲ” ဟု ပြောသည်။
ဧရာဝတီမြစ်ဝကျွန်းပေါ်ဒေသတွင်လည်း လှေ၊ သမ္ဗာန်နှင့် သင်္ဘောများ ကျိူးပဲ့နစ်မြုပ် အသေ အပျောက်များကြောင်း၊ လပွတ္တာမြိ့နယ်အတွင်း၌ အဆောက်အအုံများ (၇၅) ရာခိုင်နှုန်း ပျက်စီး ကုန်ပြီး လူပေါင်း (၉) သောင်းကျော် အိုးအိမ်မဲ့ဖြစ်သွားသည်ဟု စစ်အစိုးရက သတင်းထုတ် ပြန်သည်။
မုန်တိုင်းဘေးကယ်ဆယ်ရေးအတွက် ကုလသမဂ္ဂက ထောက်ပံ့ကယ်ဆယ်ရေးအဖွဲ့စေလွှတ်ရန် စီစဉ်နေပြီး ကယ်ဆယ်ခွင့် ရရှိရန် စောင့်ဆိုင်းနေရဆဲဖြစ်ကြောင်း သိရသည်။
စစ်အစိုးရက ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ မွန်နှင့် ကရင်ပြည်နယ်တို့၌ အရေးပေါ် အခြေ အနေ ကြေညာခဲ့ပြီး ၀န်ကြီးချုပ်နှင့် ကာကွယ်ရေးဦးစီးချုပ် (လေ) တို့က ရန်ကုန်စစ်ရုံးချုပ်၌ စခန်း ထိုင်ကာ ကယ်ဆယ်ရေးလုပ်ငန်းများ ညွှန်ကြားနေသော်လည်း ထိထိရောက်ရောက် ဆောင်ရွက် ပေးခြင်း မရှိသေးချေ။
မုန်တိုင်းကယ်ဆယ်ရေး အကြောင်းပြချက်ဖြင့် မူဆယ်မြို့၌ သွင်းကုန်ထုတ်ကုန်လုပ်ငန်းရှင်များကို အစည်းအဝေးခေါ်ယူကာ ကုမ္ပဏီတခုလျှင် အလှူငွေ ကျပ် (၁) သိန်း ထည့်ခိုင်းနေသည်ဟု မူဆယ်မြို့ခံ ကုန်သည်တဦးက ပြောကြားသည်။ |
