မော်လမြိုင်မြို့ဈေးကြီး မီးလောင်ပြီးနောက် ဈေးပတ်လည် လမ်းမဘေးများ၌ ရောင်းချနေသော ဈေးဆိုင်များသည် အခက်အခဲ အမျိုးမျိုးကြောင့် ထက်ဝက်ကျော် လျော့ကျသွားကြောင်း သိရသည်။

အောက်ဈေး (ခေါ်) အမှတ် (၁) ဈေးကြီးသည် ၂၀၀၈ ခု ဒီဇင်ဘာလ၌ ဈေးကြီးတခုလုံး မီးလောင်ပြာကျသွားကာ ဆိုင်ခန်းပေါင်း (၁) ထောင်ကျော် ပျက်စီးဆုံးရှုံးခဲ့သောကြောင့် ပြန်လည်ဆောက်လုပ်နေဆဲဖြစ်သည်။

ကမ်းနားလမ်းဘေးတွင် ရောင်းချနေသော ယာယီဆိုင်ခန်းများသည် မိုးတွင်းကာလ လေဒဏ်၊ မိုးဒဏ်အကြားတွင် တိုင်နှင့်အမိုးအကာများဖြင့်သာ ရောင်းချနေရပြီး ပစ္စည်းများအတွက် ညပိုင်းတွင် လုံခြုံမှု မရှိကြ၍ ယခုကဲ့သို့ ဈေးရောင်းချမှု ရပ်နားသူများနေကြောင်း မော်လမြိုင်မြို့ခံ ဆိုင်ပိုင်ရှင်တဦးက ပြောသည်။

“ကမ်းနားလမ်းမှာ ဖြစ်တဲ့အတွက် မိုးကာရတာနဲ့၊ လေကာရတာနဲ့ပဲ အလုပ်ရှုပ်နေရတယ်။ မိုးတွင်းအချိန် လမ်းကလည်း ကျဉ်းကျဉ်းလေး ဖြစ်နေပြီ။ ပစ္စည်းတွေနဲ့ ပြည့်နေတယ်။ ရွှံ့ဗွက်တွေနဲ့ ပစ္စည်းသယ်ဖို့၊ ပို့ဖို့ လုံးဝ မလွယ်ဘူး။ ပြီးတော့ ညအချိန်ဆိုရင်လည်း သေတ္တာထဲ အခန်းထဲမှာ အသေအချာ သော့ခတ်ပြီး ထားခဲ့ရတာ မဟုတ်ဘူး။ ပစ္စည်းပျောက်တာတို့လည်း ရှိတယ်။ အဲဒါကြောင့် နားလိုက်တာ” ဟု ၎င်းက ပြောသည်။

ဧရာဟင်္သာကုမ္ပဏီက ပြီးခဲ့သည့်မတ်လမှစ၍ အသစ်တည်ဆောက်နေသော ဆိုင်ခန်းပေါင်း (၁,၄၀၀) ရှိသည့် အမှတ်(၁) ခေတ်မီ နှစ်ထပ်ဈေးကြီး အချောသတ်ပြီးစီးရန် (၂) နှစ် ကြာမြင့်မည်ဟု မြို့တော်စည်ပင်က ပြောကြားနေသော်လည်း နောက်နှစ်ပွင့်လင်း ရာသီတွင် စတင်ရောင်းချနိုင်ရန် စီစဉ်နေသည်ဟု ဆိုင်ရှင်များက ပြောသည်။

ဆိုင်ရှင်တဦးက “အခု (၂၅) ရာခိုင်နှုန်း ပြီးနေပြီလို့ စည်ပင်က ပြောတယ်။ အုတ်မြစ်ချတဲ့အပိုင်း ပြီးတာပေါ့။ (၆၀) ရာခိုင်နှုန်း လောက်ပြီးရင် ဒုတိယအရစ် ငွေထပ်သွင်းရမယ်တဲ့။ ပထမအရစ်က (၁၅) သိန်း ပေးထားပြီးပြီ။ ကျမတို့က မြန်မြန် ပြီးစေချင်ပါတယ်။ ဘာကြောင့်လဲဆိုတော့ အခု မိုးတွင်းမှာ လေကြမ်းတိုက်တာနဲ့၊ ကုန်ပစ္စည်းရေစိုတာနဲ့ ဘာမှမကျန်ပါဘူး။ အခု ရောင်းနေတဲ့နေရာက အတည်တကျ ချပေးထားတဲ့နေရာလည်း မဟုတ်ဘူးလေ” ဟု ပြောသည်။